सार्थ

सार्थ

उनाड व्हावे शब्दांनीही

सैल सोडूनी लगाम सगळे

विहरत जावे इथे तिथे अन्

शोषून घ्यावे रंग वेगळे

हळू हळू मग नभामधले

उतरेल चांदणे शब्दांवरती

उजळत जातील कडे कपारी

चमकत राहील चांदण कांती

सोडून मग तेजाची उजळण

गुहा बघावी गर्द अंधारी

सघन गडदशी दुःखाची उधळण

मुरवून घ्यावी खोल अंतरी

तिथूनी दिसावा एक झरोका

अंधार भुयारी ठेचकाळता

दुरातूनी यावी किरण शलाका

अर्थांतरी शब्दाने धडपडता

यावी सागरा उधाण भरती

भाव अंतरी चिंब मुरावा

असा अनोखा शब्द लाभता

सार्थ कवीचा जन्मच व्हावा

वृंदा टिळक

दिनांक 27 फेब्रुवारी 2022

https://www.youtube.com/watch?v=FaSw_WfA8b0

आजचा दिवस.

 आजचा दिवस...

असा एखादा दिवस येतो

सकाळ होताच पाऊस येतो

थंडगार वारा मनाला ताजं करून जातो

असा एखादा दिवस येतो

ज्याच्या पायात नसतात कोणत्याच बेड्या

फुलांच्या, झाडांच्या, नद्यांच्या गोष्टी आठवतात मग थोड्या

असा एखाद्या दिवस येतो

जेव्हा वाचलेल्या कविता मनाला भिडतात

शब्दांचे अर्थ मनात खोलवर उतरतात

असा एखादा दिवस येतो

मन खेळतं झिम्मा होऊन प्रसन्न सावळं

क्षणोक्षणी होत राहतं अजूनच कोवळं

असा एखादा दिवस येतो

मन होऊन जातं पूर्ण जगलेलं शहाणं हलकं पान

वार्‍यासोबत उंच उडत, शिवून येतं आकाशाची कमान

- वृंदा

दिनांक 16/02/ 22