कामिनी

 

माहेरघरी दिन का राजा उर्फ कामिनीचे मोठे झाड. 12 - 15 फूट उंच ..त्याला साजेसा विस्तार. फुलते तेव्हा इतके फुलते की पांढरे होऊन जाते. पानांच्या हिरवाईला पार झाकून टाकते.

माझ्याकडेही आहे कुंडीत. चार वर्षे वयाची कामिनी.

आहे लाडकीच माझी, रूप गंध तिचा मनभावन. शिवाय माहेर घरून मिळालेले रोप हेही खास कारण..

काल फुलली ..इतकी की फांदी फांदीवर गुच्छ लगडले

आज फोटो काढू जाता, तिथे फारसे नव्हते उरले

त्याचा हा फोटो आणि पुढची कविता..

_---------------------

कालचा दिवस उरला नाही, मन का खंती करावे

मावळली फुले म्हणुनी कशास आता हिरमुसावे

गंध होई उणा, गळे पाकळी, कोषही दिसे उघडा,

कोमेजलेल्या फुलांचा पडला धरणीवरती सडा

फुलले होते कधी काळी, बहरले होते जीवन

कोमेजणेही फुलांचे दाखवते जीवनाचा दर्पण

क्षण क्षण कण कण अनित्य तरीही भासे निरंतर

हे ही कृतार्थ, ते ही सुंदर, आयुष्याचे खुलते अंबर

- वृंदा टिळक.